Náttskinn og dagskinn
Þegar elstu barnabörnin voru yngri, taldi ég þeim trú um að heimiliskötturinn færi alltaf úr dagskinninu á kvöldin og smeygði sér í náttskinnið áður en hann gengi til náða. Að morgni væri hann jafnan eldsnöggur að skipta um skinn eftir morgunverðinn. Þetta fannst þeim mjög spennandi og ræddu skinnskipti kattarins í þaula meðan þau fóru í náttfötin sín í gistiheimsóknum.
Nú eru þau nokkrum árum eldri og vita betur, en gera afa sínum það til geðs að halda sögunni á floti, því sá yngsti þarf að fá að taka þátt í þessu litla ævintýri hversdagsleikans.
Meðan ég hjálpaði kisa að klæðast dagskinninu í morgun og þurrkaði af honum regndropana, varð til þessi tástagaða vísa.
Hratt er gott að klæða kött
kattar þerra skottið vott
Glottir breitt með glæstan hött
glettinn semur rottuplott.
Birt: nóvember 10th, 2009 í Kveðskapur.
Aths: Segðu
Skrifaðu athugasemd